Enigmatic Jesus

The Enigmatic Jesus Mark 10:35-45 Introduction: Alang sa mga tinun-an, si Jesus maoy usa ka tulugkaron nga pagkatawo. Sa Iningles pa, enigmatic. Kon pangutan-on siya, ang iyang tubag mora’g wala dinhi wala didto. Kon siya ang mangutana, maglibog sila unsay itubag kay dunay lain siyang ipasabut luyo sa pangutana. Busa usa niana ka higayon mihangyo ang mga tinun-an nga deretsohon na lamang niya ang buot niyang ipasabut, dili na iagi og tanghaga. Usa kanila, si Judas, nakahukom na lamang nga ibaligya si Jesus ngadto sa mga utoridad kay wala magkatakdo ang ilang tumong. Dinha na sila makasabut kon kinsa si Jesus ug unsa ang iyang misyon human sa iyang pagkagbanhaw. Mata’g tuig gisaulog ang kamatayon ug pagkabanhaw ni Jesus sumala sa asoy sa mga apostoles. Apan hangtud karon si Jesus usa gihapon ka enigma, usa ka tanghaga alang niadtong buot mosunod kaniya. Ug busa aron mahimong sayon siyang sabton ug aron mahimong sayon ang pagsunod kaniya giwagtang ang iyang pagka-enigmatic, ang iyang pagkatulugkaron. Ang iyang panghunahuna ug panglantaw gipareho na lamang sa panghunahuna ug panglantaw sa kasagarang tawo. Sayon nang dawaton ang iyang mensahe ug sayon nang sundon ang iyang dalan tungod kay pareho na man kini sa mensahe nga atong madungog sa TV, sa mga entablado ug kadaghanan sa mga pulpito. Ang tinuod dili kana mao ang mensahe ni Jesus kondili atoa ra pod gikan sa atong kaisipan ug kasingkasing. Mao nang ganahan tang maminaw. Dali ra man diay sabton ug sayon ra sundon si Jesus, nganong lisud-lisuron pa jud. Apan sa pagbuhat sa ingon dili ang tinuod nga Jesuskristo ang atong ginatuohan ug ginasunod. Ang teksto nga gibasa gikan sa Ebanghelyo ni Marcos nagdala og tubag ngano nga si Jesus usa ka enigma, usa ka tulugkaron. Duha sa iyang mga suod nga tinun-an, si James ug John magsuuong anak ni Zebedee, mihangyo nga human sa ilang kadaugan sa dihang maghari na siya ibabaw sa mga kanasuran silang duha mahimong wala ug tuo niyang kamot. Mao kini ang naandan nga hulagway sa usa ka hari, adunay inner circle, ilabina ang ministro sa panalapi ug ministro sa depensa. Ang tahas sa ministro sa panalapi mao ang pagkolekta og buhis ug paggasto niini, samtang ang tahas sa ministro sa depensa mao ang pagtukod ug pagmando sa kasundalohan. Ang usa ka hari ilhon nga lig-on kon ang gingharian daghang bahandi ug may gamhanang armadong kusog. Sama ni Haring David ug Haring Solomon nga nabantog ug gikahadlokan sa kasikbit nga kanasuran. Buot ni James ug John nga moambit niini aron moasenso usab sila gikan sa pagkakabus nga mangingisda. Mao pod kana ang dagway sa pulitika karon. Ang gitinguha sa mga kandidato mao ang dugang bahandi ug gahum pinaagi sa pagmando sa lungsod. Ug kadtong mga leader nga naningkamot alang sa ilang kadaugan nagtinguha pod nga makaambit sa bahandi ug gahum nga maoy ganti sa mga mananaug. Mao nang dunay mga leader nga magpinatyanay tungod kay inigkadaug sa ilang kandidato mora pod sila’g gagmayng hari, mora pod og nakadaug sa lotto. Ingon niini ang giapas ni James ug John. Apan ang managsuon gisupla ni Jesus pinaagi sa usa tigmo: “Makahimo ba kamo sa pag-inum gikan sa kopa nga akong pagaimnon ug sa pagpakig-ambit sa akong bawtismo?” Abtik kaayo ang duha mga mitubag, “makahimo kaayo, mu lang!” Ang ilang gihunahuna mao ang bino, nagbaha nga bino panahon sa kombera sa kadaugan. Sa pagsabut nila ang bawtismo nga giingon ni Jesus mao ang seremonyas sa koronasyon isip hari. Apan ang pangutana ni Jesus usa ka tigmo. Ang kopa nga giingon ni Jesus mao ang iyang pagsakit diha sa krus, ug ang bawtismo mao ang iyang kamatayon. Ingon pa ni Jesus, “wala mo kasabot sa inyong gipangayo, apan sayran ko kamo nga moambit kamo sa akong kopa ug bawtismo,” nga sa ato, sakiton ug patyon usab sila. Apan nianang higayona walay usa kanila nga nakatugkad sa maong tigmo. Midapayon si Jesus pag-ingon nga ang labing gamhanan sa mga Gentil naghari-hari ibabaw sa tanan ug ang mga opisyales mipahamtang og mabangis nga pagmando ngadto sa katawhan. Ang pulong Gentil gikan sa Griego, ethnos, nga nagkahulogan langyawng kanasuran. Ang gipasabut niini mao ang Roman Empire, ang Emperyo sa Roma nga naglangkob og daghang kanasuran. Naila sa kasaysayan ang tumang kabangis ug pagpanaugdaug sa Roman Empire. Nagtuo ang mga tinun-an nga ingon gayud niana ang kahulogan ug paagi sa pagmando. Mao kini ang ilang nahibawan sa tanang emperyo nga nangagi ug bisan pa gani ang paagi sa pagmando ni David. Apan miingon si Jesus nga dili ingon niana ang pagmando nga iya sa Dios. Ug mihatag siya’g laing tanghaga: ang labing una angay nga suluguon sa tanan. Ang pulong “una” hubad sa Griego, protos ug sa Latin, primus. Ilalum sa Roman Empire, ang protos ug primus walay lain kondili ang emperador sa Roma. Ang emperador mao ang numbero uno sa bahandi, gahum, himaya ug dungog. Ang tanan, gikan sa numero dos ug hangtod sa katapusang numero sa katilingban kinahanglan moyuko ug mosimba sa emperador, ang numero uno. Apan gibalit-ad kini ni Jesus: kinsa kadtong magpaka-emperador magpaka-ulipon, doulos, sa Griego pa. Unsa man ning tigmoa? Ang tubag: mao kana ang tigmo sa gingharian sa Dios. Sulod sa gingharian sa Dios ilhon nga labing dungganan kadtong nagbuhat sa buluhaton sa mga ulipon. Ug unsa man ang buluhaton sa mga ulipon sa panahon ni Jesus? Sila ang tiglimpyo’g kasilyas, nangabudlay nga walay suhol, magbalantay og karnero, tig-alsa sa karo sa mga dato. Matud ni Jesus ngadto sa mga tinun-an, kanang matanga sa trabahoa mao ang pinakataas nga opisyo didto sa gingharian sa Dios. Kadakung binuang! “Ginoo, ayaw na mi estoryahi’g tigmo,” reklamo sa mga tinun-an, “ kay mabuang mi!” Busa gidungog si Jesus nga nabuang, gisudla’g demonyo. Og dili nato mahubad ang tigmo sa gingharian, tingali’g mabuang sab ta. Atong hubaron ang tigmo aron dili ta mabuang. Dili ko moingon nga mao ra gyud ni ang bugtong hubad. Apan mao kini ang akong hubad motuo mo’g sa dili. Ang gitudlo ni Jesus ngadto sa mga tinun-an mao kini: kining mga han-ay sa katawhan nga anaa sa labing ubos nga bahin sa katilingban mao ang labing takus nga alagaran. Sila ang dapat ilhon nga numero uno aron silbihan. Busa ang mga simbahan nga anaa sa kabukiran nga nag-alagad sa mga kabus nga mag-uuma nga dili makasweldo og husto sa pastor, kini nga mga simbahan mao ang nakatuman sa mando sa Ginoo. Apan kadtong mga simbahan nga nag-alagad sa mga gamhanang politiko ug dagkong sapian wala makatunong sa ilang pagpangalagad. Ang mga simbahan nga nag-alagad sa dili kaayo kabus ug dili pod kaayo dato, matawag natong medyo naka-igo ug medyo wala pod makaigo. Mao kini ang pamalandongan sa mga pastor nga magpili og simbahan, dili modawat og assignment kon ang parsonage dili bagay sa ilang pamilya. Kon sundon gayud ang pagbuot ni Jesus, mag-ilog unta ang mga pastor nga ma-assign didto sa mga kabus nga simbahan. Ug ang labing buotan ug batid nga pastor adto derecho i-assign sa kabukiran. Pwede pod og ato ning i-apply sa mga pangulo sa kagamhanan. Ang usa ka opisyal nga matinumanon ni Kristo kinahanglang mopili kon kinsa ang silbihan – ang mga dagko bang asendero ug magpapatigayon, o ang mga lungsuranon ba nga naglangoy sa kawad-on? Iya bang gamiton ang gahum ug bahandi sa gobierno aron molapad pa gayud ang kabtangan sa pipila lamang ka adunahang banay, o iya ba kining ibuhos aron ang bagang katawhan makabaton og tawhay nga panimuyo. Kon hubaron nato ang laing tigmo ni Jesus, masayon pa sa kamelyo paglusot sa mata sa dagum kay sa usa ka pangulo sa kagamhanan nga mahimong alagad sa gingharian. Dugay na ang katawhan nangandoy nga makabaton og matarung mga pangulo. Unta maoy magmando sa lungsod ang mga tawo nga nakasabut sa tigmo ni Jesus mahitungod sa matuod nga pangulo. Apan unsaon man sa mga pangulo sa gobierno pagkasabut sa tigmo ni Jesus kon ang mga pastor wala pod makasabut ug wala magkinabuhi sa tigmo sa gingharian sa Dios? Unsa may pulos sa atong pamastor kon manundog na man hinuon kita sa mga Gentil sama sa pangandoy ni James ug John? Mahisama kita sa asin nga dili parat ug suga nga walay kahayag. Kita ang angay motudlo ug mogiya sa mga politiko dili kay sila ang magbuot unsaon pagpamastor. Conclusion: Ang gahum ibabaw sa katawhan mao ang gihandom niadtong buot mangulo sa katilingban. Sila mga Gentil ug ang ilang ginasunod mao ang emperador sa Roma. Sa laing bahin, ang gahum sa pag-alagad sama sa ulipon mao ang gisaad ni Jesus alang niadtong mosunod kaniya. Usa kini ka binuang alang sa mga Gentil, apan usa kini ka tin-aw nga kamatuoran alang kanato nga mga pumuluyo sa gingharian sa Dios. ------------------------------------------- Rev. Everett Mendoza Joint Session of NDC, NNC, CMAC Dumaguete UCCP 08 May 2013